Санаи 13 июни соли 2026 дар Кумитаи андоз ҷаласаи корӣ доир гардид. Дар он муовини Раиси Кумитаи андоз Раҳимзода Абдусалом, намояндагони Агентии назорати давлатии молиявӣ ва мубориза бо коррупсия — Раҳмонзода Фаромарз ва Асламзода Фарҳод, инчунин сардорони раёсатҳо, муовинони сардор ва дигар кормандони масъули дастгоҳи марказӣ (ҳузурӣ) иштирок намуданд. Ҳамзамон, сардорон, муовинон, сардорони шуъбаҳо ва дигар кормандони масъули мақомоти ҳудудии андоз, ҷамъ 288 нафар, ба тариқи маҷозӣ (онлайн) дар ин ҷаласа ширкат варзиданд.

    Дар ҷаласаи корӣ пешниҳодҳои Агентии назоратии давлатии молиявӣ ва мубориза бо коррупсия мавриди баррасӣ қарор гирифта, доир ба амалисозии марҳилаи дуюми «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» (барои солҳои 2026-2030) таъкид гардид.

    Муовини Раиси Кумитаи андоз Раҳимзода Абдусалом қайд намуд, ки дар Кумитаи андоз ҷиҳати пешгирии коррупсия ба таври мунтазам корҳои муайян анҷом дода мешаванд. Аз ҷумла, ҳамасола бо фармоишҳои дахлдори Кумитаи андоз нақшаи чорабиниҳои дохилиидоравӣ ҷиҳати таъмини иҷрои Стратегияи давлатии муқовимат ба коррупсия қабул ва амалӣ карда мешавад.

    Намояндагони Агентӣ дар баромади худ таъкид доштанд, ки муқовимат бар зидди ҳама гуна амалҳои коррупсионӣ на танҳо вазифаи кормандони мақомоти давлатӣ, балки вазифаи ҷонии ҳар як шаҳрванд мебошад.

    Дар аснои чорабинӣ байни иштирокчиён доир ба раванди муқовимат ба коррупсия, аз байн бурдани сабабу шароитҳои ба ин зуҳуроти номатлуб мусоидаткунанда, баланд бардоштани мавқеи кишвар дар раддабандиҳои байналмилалӣ ва таҳкими фарҳанги ҳуқуқии аҳолӣ муколамаи судманд сурат гирифт. Иштирокчиёни ҷаласа ба саволҳои худ посухҳои мушаххас гирифтанд.

    Рузи 11 майи соли 2026 дар шаҳри Брюссел, дар доираи сафари корӣ, Раиси Кумитаи андози назди Ҳукумати Ҷумҳурии Тоҷикистон Давлатзода Нусратулло Муқим бо Раиси Шӯрои Мудирияти Хадамоти давлатии федералии молияи Шоҳигарии Белгия ҷаноби Филип Ван де Велде мулоқот анҷом дод.

    Мулоқот дар доираи сафари омӯзишӣ дар қароргоҳи Хадамоти давлатии федералии молия дар шаҳри Брюссел, баргузор гардид, ки он аз ҷониби Хадамоти давлатии федералии молияи Шоҳигарии Белгия ва Хазинаи байналмилалии асъор ташкил карда шудааст.

    Дар ҷараёни мулоқот тарафҳо масъалаҳои мубрами маъмурикунонии андоз, ислоҳоти низоми андози ду кишвар, идоракунии қарзҳои андозӣ, инчунин дурнамои рушди минбаъдаи ҳамкориҳои дуҷониба миёни мақомоти андози Тоҷикистон ва Шоҳигарии Белгияро мавриди баррасӣ қарор доданд.

    Раиси Кумитаи андоз Давлатзода Нусратулло Муқим дар ҷараёни мулоқот ҷониби Белгиявиро бо натиҷаҳои асосии ислоҳоти андозии дар Ҷумҳурии Тоҷикистон тайи солҳои охир амалишаванда шинос намуд. Инчунин, дар мулоқот ба масъалаҳои рақамикунонии соҳаи андоз таваҷҷӯҳи хосса зоҳир гардид.

    Дар фарҷоми вохӯрӣ ҷонибҳо аҳамияти идомаи чунин мулоқотҳоро ҳамчун омили муҳими тақвияти ҳамкориҳои дуҷониба ва татбиқи босамари ташаббусҳои муштарак таъкид намуда, изҳори боварӣ карданд, ки ҳамкориҳои минбаъда ба рушди устувори соҳаи андоз ва иқтисодиёти кишвар мусоидат хоҳад намуд.

14 апрели соли 2026 дар бинои Кумитаи андози назди Ҳукумати Ҷумҳурии Тоҷикистон вохӯрии Раиси Кумитаи андози назди Ҳукумати Ҷумҳурии Тоҷикистон Давлатзода Нусратулло Муқим бо роҳбари навтаъини Намояндагии Иттиҳоди Аврупо дар Ҷумҳурии Тоҷикистон, Сафир Радослав Дарски баргузор гардид.

Дар оғози мулоқот Раиси Кумитаи андоз Сафири Иттиҳоди Аврупоро ба муносибати таъйин гардиданаш ба вазифаи роҳбари Намояндагии Иттиҳоди Аврупо дар Ҷумҳурии Тоҷикистон табрик намуда, ба Ӯ дар иҷрои вазифаҳои пурмасъул барору муваффақиятҳо хоҳон шуд.

Зимни идомаи мулоқот, Ҷаноби Сафир иброз дошт, ки рушди иқтисодиёти Ҷумҳурии Тоҷикистон, инчунин нишондиҳандаҳои буҷети давлатӣ диққатҷалбкунанда буда, дар маҷмӯъ нисбат ба дастовардҳои иқтисодии кишвар таассуроти мусбӣ ҳосил кардааст.

Дар рафти вохӯрӣ ҷонибҳо оид ба вазъи кунунӣ ва дурнамои рушди ҳамкориҳои мутақобилан судмандро дар соҳаи маъмурикунонии андоз мавриди муҳокима қарор доданд.

Дар навбати худ, Раиси Кумитаи андоз омодагии мақомоти андозро ҷиҳати тавсеаи ҳамкориҳои судманд, идомаи муколамаи созанда ва татбиқи минбаъдаи ислоҳот дар ҳамоҳангӣ бо шарикони байналмилалӣ иброз намуд.

Дар фарҷоми вохӯрӣ ҷонибҳо аҳамияти идомаи чунин мулоқотҳоро ҳамчун омили муҳими тақвияти ҳамкориҳои дуҷониба ва татбиқи босамари ташаббусҳои муштарак таъкид намуда, изҳори боварӣ карданд, ки ҳамкориҳои минбаъда ба рушди устувори соҳаи андоз ва иқтисодиёти кишвар мусоидат хоҳад намуд.

Гузаронидани таҳлили хавфҳои коррупсионӣ дар мақомоти андоз

    Санаи 3 апрели соли 2026 дар Кумитаи андоз бо иштироки роҳбарияти Кумита, аъзои гурӯҳи корӣ ва намояндаи Агентии назорати давлатии молиявӣ ва мубориза бо коррупсия ҷаласаи гурӯҳи кории дохилиидоравии Кумитаи андоз ҷиҳати гузаронидани таҳлили хавфҳои коррупсионӣ дар мақомоти андоз баргузор гардид.

    Дар ҷаласаи мазкур масъалаҳои зерин баррасӣ гардиданд:

    1. Таҳлили иҷрои Нақшаи мукаммал барои соли 2025 ҷиҳати пешгирӣ, бартараф ва коҳиш додани хавфҳои коррупсионие, ки аз ҷониби гурӯҳи кории дохилиидоравии мақомоти андоз оид ба баҳодиҳии хавфҳои коррупсионӣ дар ҷараёни гузаронидани таҳлили хавфҳои коррупсионии Кумитаи андоз, ки бо фармоиши Раиси Кумитаи андоз аз 09.04.2025, №220 тасдиқ гардидааст.

    2. Баррасии лоиҳаи рӯйхати санадҳои меъёрии ҳуқуқии соҳаи андоз, ки дар солҳои 2025-2026 қабул карда шудаанд ва барои гузаронидани таҳлили хавфҳои коррупсионӣ пешниҳод гардидаанд.

    3. Баррасии пешниҳодҳои Агентии назорати давлатии молиявӣ ва мубориза бо коррупсияи Ҷумҳурии Тоҷикистон, ки дар моҳи марти соли ҷорӣ ба Кумитаи андоз ворид шудаанд.

    Ҷаласаро муовини раиси Кумитаи андоз (Роҳбари гурӯҳи кории дохилиидоравӣ) Бахтиёр Султон оғоз намуда, таъкид карданд, ки муқовимат ба коррупсия яке аз самтҳои муҳими сиёсати давлатӣ буда, вазифаи ҳар як фарди ҷомеа, махсусан мақомоти давлатӣ ва хизматчиёни давлатӣ ба ҳисоб меравад.

    Қайд гардид, ки имрӯз дар ҷомеаи ҷаҳонӣ коррупсия як падидаи номатлуб маҳсуб ёфта, аз байн бурдани он муборизаи дастаҷамъонаи тамоми ниҳодҳои давлатӣ ва ҷомеаи шаҳрвандиро талаб менамояд.

    Тибқи муқаррароти моддаи 162 Кодекси андоз яке аз вазифаҳои асосии мақомоти андоз муайян намудани расмиёт ва усулҳои гузаронидани таҳлили хавфҳои коррупсионӣ мебошад.

    Ҳангоми таҳлили заминаҳои қонунгузорӣ аз ҷониби гурӯҳи корӣ оид ба баҳодиҳии хавфҳои коррупсионӣ вобаста ба ошкор намудани ҳолатҳои зерин, аз ҷумла мавҷуд набудани меъёрҳо, нопуррагӣ ва ба таври дахлдор татбиқ нагаштани онҳо диққати махсус дода шуд.

    Дар чорабинӣ сарнозири Раёсати муқовимат бо коррупсияи Агентии назорати давлатии молиявӣ ва мубориза бо коррупсия Баҳромҷони Бобо баромад намуда, баргузории ҷаласаи Гурӯҳи кории дохилиидоравиро ҷиҳати гузаронидани таҳлили хавфҳои коррупсионӣ дар мақомоти андоз муҳим арзёбӣ намуда, бо кормандони мақомоти андоз дар ин самт суҳбат ва корҳои фаҳмондадиҳӣ анҷом дод.

    Ҳамчунин дар ҷаласа иҷрои бандҳои дахлдори нақшаи чорабиниҳои амалисозии Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 барои марҳилаи дуюм (солҳои 2026–2030) таъкид гардид.